Illa part situada plü a l’ost da la Svizra, in vicinanza da l‘Italia e collià sur il Pass dal Fuorn cul rest da la Svizra, as stenda il Parc regiunal da natüra Biosfera Val Müstair. Il Parc regiunal da natüra, recugnuschü daspö il 2010, fuorma üna part dal Reservat da Biosfera da l‘UNESCO Engiadina Val Müstair ed ha in mera da mantegner ed augmantar la valur da la cuntrada natürala unica cun üna surfatscha da 448 km2 tras ütilisaziun persistenta.
Il böt dal Parc da natüra Biosfera Val Müstair es quel da promouver la cooperaziun da la società, cultura, natüra, ecologia ed economia, per mantegner ün spazi da viver ferm e prezius per generaziuns futuras. Plazzas da lavur avuonda, ün bel territori d‘abitar pella populaziun, üna natüra intacta sco eir ün’agricultura variada sun böts parzials dal proget.
Finanzià vain il parc da natüra tant tras contribuziuns da la Confederaziun, dal Chantun e dal Cumün, dad entradas per lavur prastada per terzs ed aignas prestaziuns sco eir tras contribuziuns da sponsurs e dad organisaziun na statalas.
