Nos cumün

La dretta Val Müstair – Cultura vivainta in accord culla natüra 

Daspö ils 1. schner 2009 fuorman las ses fracziuns Fuldera, Lü, Tschierv, Valchava, Sta. Maria e Müstair il nouv Cumün da Val Müstair.

Sün üna surfatscha da 198.65 km2 offra il cumün attractiv üna richa spüerta d’activitats da temp liber ed arrandschamaints culturals. La Val Müstair es la patria da ca. 1'500 abitantas ed abitants: ils Jauers chi’s distinguan tras lur caracter modest, avert e cordial ed eir tras lur lingua. 

Sco unica val meridiunala dal Grischun, ha la Val Müstair la lingua ufficiala „rumantsch vallader“ cul dialect da la val nomnà „jauer“. Daplü infuormaziuns davart il rumantsch sco bain cultural chattan Ellas/Els qua.

Politicamaing appartegna il cumün a la Regiun Engiadina Bassa / Val Müstair. La regiun turistica Val Müstair es colliada culla destinaziun Engiadina / Scuol / Samignun / Val Müstair (TESSVM) cun sedia a Scuol. Tuot davart las spüertas turisticas chattan Ellas/Els qua.

Il cumün vain predschà da giasts e dad indigens per sia natüra unica e sia cultura richa: Il Reservat da Biosfera da l‘UNESCO Engadina Val Müstair e la Clostra San Jon sco patrimoni cultural mundial, sun be duos da bleras fascinaziuns chi distinguan la Val Müstair. 

La dürabiltà sta i’l center dal svilup da la Val. I’l plan da master "Val Müstair 2025" vezzan Ellas / Els tuot quai chi concerna la ventura strategia e la posiziun dal cumün da Val Müstair.