Uffizi d‘impostas

Cumün da Val Müstair 

Il Cumün da Val Müstair ha ca. 1‘200 persunas natüralas cun oblig da pajar impostas. Il collavuratur da l’uffizi d’impostas Val Müstair evada, per incumbenza da l’administraziun chantunala d’impostas,  ca. 80% da las taxaziuns definitivas. El taxescha medemmamaing las persunas cun oblig da pajar impostas dal cumün da Zernez. Manar il register d’impostas e las lavurs chi stan in connex cun quel, fan medemmamaing part da las incumbenzas centralas sper la taxaziun da las impostas specialas chi vegnan descrittas plü precis qua suot. 

Imposta sülla devoluziun d’ierta ed impostas sün donaziuns

Il Cumün da Val Müstair impuona in congual chantunal impostas sülla devoluziun d’ierta ed impostas sün donaziuns fich moderadas. Impostas da pajar sun: 

  • Partenaris matrimonials, persunas in partenanza registrada e descendents directs sun deliberats da l’imposta d’ierta  
  • Per il rom geniturial vegnan impuonüts 4 % imposta d’ierta 
  • Per ils ulteriurs benefiziats vegnan impuonüts 20 % imposta d’ierta

Da las donaziuns ad ün genitur pon gnir dedüts in üna jada CHF 100'000.00.

Imposta sün gudogn tras vendita d’immobiglias

Las impostas sün gudogn tras vendita d’immobiglias vegnan decisas e missas in quint pel Chantun sco eir pel Cumün tras l’administraziun chantunala d’impostas. Il Chantun stabilischa la part dal Cumün directamaing culs cumüns. La tariffa maximala da l’imposta es per Chantun e Cumün 15 %. In cas da venditas davo 11 ons dürada da possess, vain concessa üna reducziun da l’imposta dad 1.5 % l’on sül import da l’imposta. Davo 44 ons vain ragiunta la reducziun maximala da 51 %. La svalütaziun da la munainda ed eventualas investiziuns sun ulteriurs facturs chi influenzeschan l’otezza da l’imposta chi’d ha da gnir pajada.

Imposta da müdaman

In cas da müdadas da man da tocs terrain i‘l territori cumünal ha da gnir pajada ün’imposta da müdaman da 2 % da la valur da marchà. Sco valur da marchà vala pelplü il predsch da vendita. Cull’introducziun da la ledscha d’impostas cumünala e la ledscha d’impostas da baselgia (GKStG) consista per tuot ils cumüns i’l chantun üna ledscha d’imposta da müdaman unitaria. La ledscha cugnuoscha il möd da verer economic.  

Impostas d‘immobiglias

La tariffa actuala da l’imposta d’immobiglias  importa 1.0 promil da la valur fiscala. L’imposta d’immobiglias vain impuonüda minch’on per la fin da l’on per l’inter toc terrain. Correspundentamaing ha l‘imposta da gnir scumpartida, in cas dad unitats da condomini, tenor la quota da valur süls proprietaris in condomini. 

Imposta a la funtana

Per la fixaziun da las impostas a la funtana es repunsabla l’administraziun chantunala d’impostas. L’imposta a la funtana vain definida sün fundamaint dals seguaints decrets:  

  • Ledscha d’impostas pel chantun Grischun incl. revisiuns parzialas cun disposiziuns executivas 
  • Ledscha federala davart l’imposta federala directa cun ordinaziun davart l’imposta a la funtana in cas da l’imposta federala directa 

Our da las directivas davart la fixaziun da l’imposta a la funtana as poja gnir a savair las sorts da tariffas e’ls termins da far giò quint ed exaimpels da far ils quints. Las directivas pon gnir consultadas online pro l’Administraziun chantunala d’impostas.  Infuormaziuns per telefon: +41 (0)81 257 34 91 / 92. 

Links chi mainan inavant

Collavuratur e contact

Ulteriuras infuormaziuns scumparta l’uffizi cumünal d’impostas.  

Uffizi cumünal d’impostas Val Müstair
Forum
CH-7537 Müstair

Rudolf Andri
Tel. +41 (0)81 851 62 08
Fax +41 (0)81 851 62 01
rudi.andri@cdvm.ch