Agricultura Val Müstair

Producziun persistenta da gran, lat e charn 

«Nus vain blers s-chazis chi ston gnir cultivats e conservats.»

Vachas chi pasculeschan sün pas-chs verds, tractors diligiaints immez vasts chomps da gran. L’idil da l’agricultura in Val Müstair es persistentamaing biologic, perquai cha las pauras e’ls paurs da la regiun cultivan lur bains tenor las directivas da l’agricultura biologica. Sper l’allevamaint da muvel bovin e la producziun da lat, as sviluppa vieplü eir la cultivaziun da gran e dvainta ün important rom da l’intrapraisa. Per rinforzar inavant quel e til fabrichar oura, s’han miss insembel paurs chi han realisà ün proget per ün svilup regiunal (PRE).

Portadra es l‘Agricultura Jaura ScRL., fundada da 25 paurs e duos instituziuns. I'l fratemp sun gnüts pro amo 7 paurs. La mera dal proget es da mantegner e da s-chaffir plazzas da lavur attractivas illa regiun. Per ragiundscher quist böt sun gnüts realisats differents progets parzials.

• Nouv fabricat da la chascharia 
• Fabrica d’ün mazzaduoir e local pell’elavuraziun da charn 
• Modernisaziun dal post da deposit central da gran 
• Augmaint da la qualità dal prodot illa producziun da lat tras müdada dal möd da pavlar renunzchond al silo 
• Augmaint da la part dals prodots chi vain commercialisà tras il Parc da natüra Biosfera Val Müstair 

Cun quai vain rinforzada la competitività da l’agricultura da maniera persistenta ed augmantada l’attractività da quist important rom economic per paurs giuvens.