MÜSTAIR – LA CLOSTRA

La Clostra San Jon e la legenda
dal rai dals Francs

Ün’istorgia da 1200 ons: quai simboliseschan las müraglias da la Clostra San Jon a Müstair. Sur da la fundaziun i’l 8. tschientiner circuleschan mitos e legendas.

Uschè dess il rai dals Francs, Carl il Grond, avair fundà la clostra. Da quai dà perdüttanza la statua fatta da stuc illa baselgia. Be uschè? Na dal tuot. Seguond la legenda es Carl il Grond intivà sül pass da l’Umbrail, tanter Buorm e Sta. Maria, in üna strasora da naiv sainza remischiun. In fatscha a la mort ha el fat il vut da fundar ün monasteri, in cas ch’el vess da s-champar san e salv da la strasora. 

Kirche Kloster St. Johann in Müstair

Istorgia da 1200 ons

Fundada sco clostra da muongs l‘on 775, es ella ün convent da duonnas daspö il 12. tschientiner ed es adüna statta abitada dürant sia istorgia da passa 1200 ons. La clostra ha dat a la Val Müstair seis nom. Müstair deriva nempe dal pled latin  „monasterium“ chi significha monasteri o clostra.

 

In sia lunga istorgia nun es la clostra mai gnüda desdrütta dal tuot ed adüna renovada be parzialmaing. Uschè es il cumplex claustral caracterisà dad üna cumbinaziun da differentischems stils architectonics chi derivan da differentischmas epocas. Sco culminaziuns architectonicas valan la baselgia e la Chapella Soncha Crusch chi dateschan dal temp da fundaziun, l‘8. tschientiner, la Tuor Planta dal 10. tschientiner e la residenza da l’ovais-ch dal 11. tschientiner.

Lö dal patrimoni cultural mundial da l‘UNESCO

Cur cha la Clostra San Jon es gnüda integrada dal 1983 illa glista dals lös dal patrimoni cultural mundial da l’UNESCO, as daiva la priura actuala da buonder cha üna tala clostra caduca saja gnüda nominada lö dal patrimoni cultural mundial da l‘UNESCO – las muongias vaivan quella jada da metter butschins e sadellas, cur chi plovaiva. 

Per la recepziun illa glista dal patrimoni da l’UNESCO sun stattas decisivas las pittüras müralas illa baselgia da la clostra.

Cul temp e grazcha a la perscrutaziun archeologica al lö sun gnüts scuverts ulteriurs s-chazis da l’istorgia architectonica: La Tuor Planta sco la plü veglia tuor d’abitar e da defaisa i’l spazi da las Alps, la Chapella Soncha Crusch d’epoca carolingica e la residenza da l’ovais-ch, per nomnar be ils plü importants.   

Museum da la clostra

Il Museum da la clostra as rechatta hoz illa tuor d’abitar e da refügi da passa milli ons, la Tuor Planta. Visitadurs dal museum as pon instradar, fond ün viadi da temp tras l’istorgia architectonica da la clostra da 1200 ons. 

Las sours benedictinas da Müstair spordschan invista illa clostra ed in lur vita da plü bod ed hozindi. La visita guidada maina als giasts i’l claustrigl, passond tras l’imposant schler da la Tuor Planta e süls trais plans superiurs d‘üna «clostra illa clostra».

Locals da rapreschentaziun e d’abitar, chombras da durmir e locals d’uraziun sco eir la chombra Balcun Aut, üna graziusa stüva dal temp baroc. Chats archeologics, s-chazis da l’istorgia da l’art e clinözs da la clostra as spordschan a la contemplaziun.

Uras d‘avertüra

Il museum es avert di per di cun excepziun dals 
25 december

Mai – october
09.00 – 17.00 h
Dumengia e firats 13:30 – 17:00 h

November – avrigl
10.00 – 12.00 e 13.30 – 16.30 h
Serrà l’avantmezdi da dumengias e firats

Infuormaziuns ed annunzchas

Museum & butia
Tel. +41 (0)81 858 61 89
visit-museum@muestair.ch